Ұлан ауданындағы Қасым Қайсенов кентінде алғаш рет Nomad Álemi мәдени фестивалі өтті. Шараға бес мыңға жуық адам қатысты, деп хабарлайды F16.kz сайты.
Фестиваль көшпенділер өркениетін тарихи мұра ретінде ғана емес, қазіргі мәдениетпен сабақтастыра көрсетуге бағытталды. Бір күндік бағдарламаға ұлттық музыка мен ойындар, қолөнер, дәстүрлі тағам, этнография, саятшылық, заманауи өнер және балаларға арналған шығармашылық алаңдар кірді.
Фестивальдің ашылуына Шығыс Қазақстан облысының әкімі Нұрымбет Сақтағанов қатысты. Шара барысында аудан мен өңірдің дамуына үлес қосқан бірқатар азамат марапатталды. Олардың қатарында биыл 50 жылдығын атап отырған құс фабрикасының қызметкерлері де бар.
Музыкалық сахнада Yenlik, Urker, Arshat, «Арқайым», «Тәңірі», «Алатау серілері», Steppe Sons және Dudeontheguitar өнер көрсетті.
Ал Nomad Talks алаңында көшпенділер мәдениеті, ұлттық тағам, түркі мұрасы, туған өлке тарихы, қолөнер және саятшылық туралы пікірталастар мен кездесулер ұйымдастырылды.
Фестивальдің этнографиялық бөлігінде қолөнершілер бұйымдарын таныстырып, дәстүрлі тағамдар ұсынылды, ұлттық ойындар өткізілді. Саятшылық өнеріне арналған алаңда бүркітшілік дәстүрі көрсетілді.
Заманауи бағыт та назардан тыс қалған жоқ. Астанадан келген суретшілер «Полигоналды Марал» арт-нысанын ұсынып, оның жасалуына фестиваль қонақтарын да қатыстырды. Балаларға арналған «Болашақ» кеңістігінде шығармашылық шеберлік сабақтары мен интерактивті бағдарламалар өтті. TikTok аймағында ұлттық тақырып заманауи цифрлық форматта ұсынылды.
Фестивальдің символдық нысандарының бірі – үш өңірді аралаған шаңырақ. Ол ортақ мәдени құндылық пен бірліктің белгісі ретінде ұсынылды.
Осылайша Nomad Álemi ұлттық дәстүр мен заманауи мәдениетті бір алаңда тоғыстырды. Ұйымдастырушылар көшпенділер мұрасын тек өткеннің тарихы ретінде емес, бүгінгі өнерде, шығармашылықта және қоғамдық өмірде жалғасын тауып отырған мәдени құндылық ретінде танытуды көздеді.
