9 мамырдан бастап «Одесса» паромы Бұқтырма су қоймасы арқылы өтетін Васильев өткелінде тұрақты рейстерін бастады, деп хабарлайды F16.kz.
Паром Самар мен Үлкен Нарын аудандарының жағалауларын байланыстырып, екі аудан тұрғындары үшін маңызды көлік қатынасы болып қала береді.
Самар ауданының әкімі Серік Жеңісов «Одесса» паромының ұжымын навигациялық маусымның ашылуымен құттықтап, кеме басшылығымен алдағы бірлескен жоспарларды талқылады.
Негізгі бағыт – туризмді дамыту. «Одесса» паромы – еліміздегі ерекше нысандардың бірі. Мұндай өткелдер Қазақстанның тек екі өңірінде – Павлодар және Шығыс Қазақстан облыстарында ғана бар. Сондықтан бұл паром аймақтың туризм саласының маңызды бөлігіне айналуға тиіс деп есептеймін, — дейді Самар ауданының әкімі.
Облыс қонақтары “Одесса” теплоходы арқылы Самар ауданы мен Бұқтырма су қоймасы жағалауының ерекше табиғатын тамашалап, өңіріміздің әсемдігі, әлеуетімен де таныса алады.
Өз тарапымыздан инфрақұрылымды жақсарту, туристер үшін қолайлы жағдай жасау және сервисті дамыту жұмыстарын жалғастырамыз, — деп атап өтті Серік Жеңісов.
Айта кету керек, «Одесса» паромында жолаушылар тегін пайдалана алатын жоғары жылдамдықты Starlink интернеті іске қосылған.
