Шығыс Қазақстан облысының әкімі Нұрымбет Сақтағанов жұмыс сапарымен Глубокое ауданының Белоусовка кентінде болып, жылу қазандығының жұмысын көрді. «Келешек мектептері» жобасы арқылы салынған жергілікті білім ордасына бас сұқты, деп хабарлайды F16.kz.
Аймақ басшысы кенттің тұрғын үйлері мен әлеуметтік нысандарын жылумен қамтамасыз етіп тұрған қазандық жұмысын тексерді.
Қазір бұл қазандық 43 көпқабатты үйге жылу беріп отыр. Жауапты мамандар қазандықтың техникалық жай-күйі, қуаты, жылу желілері, отын қоры және негізгі жабдықтардың жұмысы туралы баяндады. Облыс әкімі күннің күрт суытуына байланысты жылу жүйесінің іркіліссіз жұмыс істеуі қажет екенін атап өтті.
Белоусовкадағы №2 жалпы білім беретін мектептің оқушылары аудандық, облыстық бәсекелерде биіктен көрініп, жоғары жетістіктерге жетіп жүр. Көпке үлгі болар білім шаңырағын аралап, ұстаздармен тілдескен Нұрымбет Сақтағанов ауылдық жерде барлық талапқа сай келетін заманауи мектептердің ашылуы ел болашағына салынған қомақты инвестиция екенін айтты.
Мұнда басқа да «Келешек мектептеріндегідей» заманауи сыныптар, спорт залы, акт залы, кітапхана, компьютер және хореография кабинеттері бар. Балалардың сапалы әрі жайлы білім алуына қажетті барлық жағдай жасалған, — деді аймақ басшысы.
«Келешек мектептері» ұлттық жобасы аясында салынған білім ордасында жаңа үлгідегі оқу кабинеттері, спорт залы, асхана, цифрлық сыныптар және басқа да арнайы кабинеттер бар. Осындай мол мүмкіндіктердің арқасында оқушылар жаңа технологияларды меңгеріп, жасанды интеллектінің қыр-сырын үйрене бастаған. Қазір мұнда 500-ден астам шәкірт тәрбиеленіп жатыр.
