Шығыс Қазақстан облысында жыл басынан бері өндірісте болған жазатайым оқиға салдарынан 94 адам зардап шекті. Көз жұмғандар саны – тоғыз. 46 адам ауыр жарақат алған, деп хабарлайды F16.kz.
Биыл өңірде еңбек заңнамасының бұзылуына қатысты 456 дерек тіркелді. Мемлекеттік еңбек инспекциясы комитетінің Шығыс Қазақстан облысы бойынша департаменті заң талаптарының сақталуын тексеру мақсатында 350 бақылау іс-шарасын өткізген.
Департамент басшысы Бақытбек Қизатовтың айтуынша, жыл басынан бері мекемеге жеке және заңды тұлғалардан 2 мыңнан астам өтініш келіп түскен. Өтініштердің басым бөлігі еңбек қатынастарына байланысты болған.
Тексеру қорытындысы бойынша 212 нұсқама шығарылып, әкімшілік құқық бұзушылықтар үшін жалпы сомасы 19,6 млн теңге айыппұл салынған.
Өндірістегі оқыс оқиғалардың басты себебі жұмысты ұйымдастыру кезіндегі олқылықтар мен еңбек қауіпсіздігі талаптарының сақталмауы деп көрсетілді.
Департамент өкілдерінің мәліметінше, жазатайым оқиғалардың себептерін анықтау үшін арнайы тергеп-тексеру жұмыстары жүргізіліп, жауапты тұлғаларға қатысты тиісті шаралар қабылданған.
Сонымен қатар биыл жұмыскерлерге төленбей қалған 293,6 млн теңге жалақы қайтарылып, 964 адамның еңбек құқықтары қалпына келтірілген.
Дегенмен жалақы бойынша мәселе толық шешілген жоқ. Қазіргі уақытта екі кәсіпорынның 19 қызметкері алдында жалпы сомасы 16,5 млн теңге берешек бар.
