Ағайынды Абдуллиндер атындағы өнер училищесінде орналасқан №84 референдум учаскесіне дауыс беруге келген өскемендіктерді жас өнерпаздар әуелеген әнмен, күмбірлеген күймен қарсы алды, деп хабарлайды F16.kz.
Бұл жерде таңертеңнен бастап мерекелік атмосфера қалыптасты. Оқу орнының шәкірттері келушілерге концерт қойып, ұлттық өнердің көркем үлгісін көрсетті. Жас таланттардың өнері дауыс беруге келген тұрғындардың көңілін көтеріп, саяси науқанға ерекше реңк берді.
Ұйымдастырушылардың айтуынша, мұндай шағын концерт тұрғындарға жақсы көңіл-күй сыйлап қана қоймай, ұлттық мәдениетті насихаттауға да бағытталған.
Тұрғындардың айтуынша, мұндай мәдени бағдарламалар дауыс беру процесін жайлы әрі әсерлі етеді. Кейбір тұрғындар жастардың өнеріне сүйсініп, олармен бірге естелік суретке де түсті.
Бүгін біз дауыс беруге үш адам келдік. Референдумның Ұлыстың ұлы күні Наурыз мейрамы қарсаңында өткізілуі көпшілікке мерекелік көңіл күй сыйлап, ерекше әсер етті. Кішкентай өнерпаздардың концертін тамашаладық, шағын жәрмеңке ұйымдастырылыпты. Көрдік, көңіліміз толды. Ең бастысы жаңадан қабылданатын Ата заңымыздың тұғыры биік, ғұмыры ұзақ болсын. Еліміз аман, жұртымыз тыныш болсын! Бейбітшілік заман болсын! – деді қала тұрғыны Бейбітгүл Самарханова.
Комиссия мүшелері референдум учаскесі өз жұмысын белгіленген уақыт бойынша жүргізіп жатқанын атап өтті. Тұрғындар учаскеге келіп, өз таңдауын жасап жатыр. Сонымен қатар, денсаулығына немесе өзге себептерге байланысты келе алмайтын азаматтарға үйде дауыс беру мүмкіндігі де қарастырылған.
Осылайша, №84 референдум учаскесінде дауыс беру тек саяси шара ғана емес, сонымен қатар мәдени атмосферамен ұштасқан ерекше күнге айналды. Жас өнерпаздардың әні мен күйі тұрғындарға көтеріңкі көңіл-күй сыйлап, көпшілікке ұмытылмас әсер қалдырды.
Айта кетейік, бүгін Өскеменде 129 сайлау учаскесі жұмыс істеп тұр.
