Өрт қауіпті маусымы басталғалы өңірде 25 орман өрті, 1 дала өрті және саяжай алқаптары мен ашық аумақтарда болған 23 өрт оқиғасы тіркелді, деп хабарлайды F16.kz.
ШҚО ТЖД мамандары тілсіз жаудың көбі отты абайсыз пайдалану салдарынан шығатынын айтады.
Өрттің алдын алу және болдырмау мақсатында 52 мобильді топ құрылды. Құрамында ТЖД, полиция, орман шаруашылығы және жергілікті әкімдік қызметкерлерінен 300 адам бар. Бүгінде облыс аумағында өрттің алдын алуға бағытталған 1000-нан астам рейдтік іс-шара ұйымдастырылды, — дейді ШҚО ТЖД баспасөз қызметі.
Нәтижесінде, өрт қауіпсіздігі ережесін 83 адам әкімшілік жауапкершілікке тартылған. Атап айтқанда, ҚР ӘҚБтК 410-бабы (Өрт қауіпсіздігі талаптарын бұзу немесе орындамау) бойынша 48 адам, 336-бабы бойынша (Қалдықтарды жинау немесе жағу кезінде атмосфералық ауаны қорғау және өрт қауіпсіздігі бойынша талаптарды сақтамау) бойынша 17 адам және 367-бабы (Ормандарда өрт қауiпсiздiгi талаптары мен санитариялық қағидаларды бұзу) бойынша 18 адам жазаланды.
Осы орайда ШҚО ТЖД құтқарушылары құрғақ шөпті өртеуге, от жағуға, жол бойына темекі тұқылын тастауға қатаң тыйым салынатынын ескертеді.
