ШҚО-да жылыту маусымына дайындық жұмыстары аясында тұрғын үйлерге мониторинг жүргізілді, деп хабарлайды F16.kz.
Бүгінде азаматтық қорғау және жергілікті атқарушы органдар, полиция, әлеуметтік қорғау қызметі өкілдерінен және еріктілерден құралған топ 1642 үйге тексеру жүргізген. Нәтижесінде, комиссия мүшелері өрт қауіпсіздігі талаптарын бұзған 355 үйді анықтады.
Көбінесе пештерде жарықтар мен саңылаулар болады немесе пеш жанына тез тұтанатын заттар қояды, мұның бәрі қауіпсіздік талаптарына сай келмейді. Электр құралдары мен желілері дұрыс қолданылмау себебінен де өрт шығуы мүмкін, — деді облыстық төтенше жағдайлар департаменті мемлекеттік өрт бақылау басқармасының бастығы Нұржан Өміржанов.
ШҚО ТЖД баспасөз қызметі таратқан мәліметке сүйенсек, ауқымды профилактикалық жұмыстар нәтижесінде өрттен қаза болғандар саны 17%-ға азайған.
Жыл сайын әлеуметтік осал топтағы азаматтардың үйіне датчиктер орнату жұмыстары жүргізіледі.
Бүгінде облыс бойынша барлығы 17 247 газ датчигі орнатылған. Нәтижесінде 42 адам, оның ішінде 31 бала құтқарылды, — деп атап өтті Нұржан Өміржанов.
Жыл басынан бері облыстағы жеке тұрғын үй секторында 388 өрт тіркелген. Бұл былтырғы сәйкес кезеңмен салыстырғанда жоғары. Өрттің басым бөлігі тұрғын үй секторы аумағында болған.
Сонымен қатар жыл басынан бері көміртегі тотығынан 21 адам уланып, оның екеуі көз жұмған.
