Өскемен арматура зауыты «Каспий Құбыр Консорциумы-Қ» АҚ—ның қажеттілігі үшін жабдықтар шығарады. Үкімет үйінде Премьер-министрдің бірінші орынбасары Роман Склярдың қатысуымен қос тарап ынтымақтастық туралы келісімге қол қойды, деп хабарлайды F16.kz порталы primeminister.kz-ке сілтеме жасап.
Өнеркәсіп жабдығының импортын алмастыру жөніндегі құжатқа «ӨАЗ» АҚ бас директоры Александр Будрис пен «Каспий құбыр консорциумының» бас директоры Николай Горбань қол қойды.
Ынтымақтастық бекіткіш арматураның, сорғы агрегаттарының және электр қозғалтқыштарының жергілікті өндірісін дамытуға, магистралды мұнай құбыры нысандарында отандық жабдық қолдануды кеңейтуге, сондай-ақ құбыр арматурасының қазақстандық ірі өндірушісі мен мұнай тасымалдау инфрақұрылымындағы негізгі операторларының бірі арасында орнықты кооперацияны қалыптастыруға бағытталған.
Келісім шеңберінде тараптар «КҚК-Қ» АҚ-ны Қазақстаннан шыққан жоғары технологиялық материалдармен, жинақтаушы бөлшектермен және жабдықтармен қамтамасыз етуге, техникалық қызмет көрсетуге, жабдықты жаңғыртуға және сынақтан өткізуге, сондай-ақ инновациялық технологиялық шешімдерді бірлесіп әзірлеуге әрі енгізуге ниетті.
