Oskemen Hub алаңында Digital Qazaqstan Battle ұлттық стартап-баттлының өңірлік жартылай финалы өтті. Іс-шарада өңірдегі жас кәсіпкерлер мен IT-командалар өздерінің инновациялық жобаларын сарапшыларға ұсынды, деп хабарлайды F16.kz.
Байқауға өңірлік стартап-командалардан барлығы 14 өтінім түскен. Іріктеу нәтижесінде олардың ішінен бес жоба ғана жартылай финалға жолдама алып, өз бастамаларын қазылар алқасына таныстырды.
Жартылай финалистер қатарында Körset, «Хроники Степи», LoyaBonus, Enterra және Solo жобалары бар. Бұл стартаптар жасанды интеллект, геймдев және бизнеске арналған цифрлық сервистер бағытында түрлі технологиялық шешімдерді ұсынды. Іс-шара қорытындысы бойынша өңірлік кезеңнің жеңімпазы LoyaBonus стартапы атанды. Жоба бизнеске маркетинг шығындарды ұлғайтпай-ақ табысын арттыруға мүмкіндік беретін клиенттерді ұстап қалу және қайта тарту платформасын ұсынады.
Енді LoyaBonus командасы өңір намысын Digital Qazaqstan Battle финалында қорғайды. Шешуші кезең 27 наурызда Шымкентте өтеді.
