Толассыз жауған қалың қар мен қолайсыз ауа райы жол қозғалысын қиындатып, бірқатар учаскеде шектеу енгізілген. Тәртіп сақшылары тек бір күн ішінде қарға батып қалған 10-нан астам жүк көлігі мен жеңіл автокөлікке көмек көрсетті, деп хабарлайды F16.kz.
Қозғалыс жабылған учаскелер қатарында Өскемен — Алтай, Өскемен — Риддер және Өскемен — Семей бағыттарындағы жолдар да бар.
Герасимовка ауылының маңында 150-ге жуық көлік қар құрсауында қалған. ШҚО ПД патрульдік полиция батальонының қызметкерлері жағдайды дер кезінде бақылауға алып, шектеулі көріну жағдайында жүргізушілерге бағыт-бағдар беріп, қауіпті учаскелерден өтуге көмектесті. Сонымен қатар жүргізушілерге ыстық шай мен кофе ұсынылды, — деп хабарлады ШҚО ПД баспасөз қызметі.
ШҚО полиция департаменті тұрғындарды жолға шығар алдында ауа райы туралы ескертулерді қарауға, барынша сақ болуға және жолдардың жағдайы жөніндегі ресми ақпаратты қадағалап отыруға шақырады.
