Өскемен жылу электр орталығында жүргізіліп жатқан жөндеу жұмыстарының жартысынан астамы атқарылды, негізгі жабдықтар алдағы жылыту маусымына дейін сақадай сай болады, деп хабарлайды F16.kz.
Бүгінде жылу орталығының №11 қазандық агрегатын іске қосу-баптау жұмыстары басталған. №7 және №9 қазандық агрегаттарының, сондай-ақ №7, 8, 10, 11 турбиналық агрегаттарының ағымдағы жөндеуі аяқталды. №4 турбинаға күрделі жөндеу жүргізілді.
№8 қазандықта жылу оқшаулағыш алынып, бүйірлік экрандар мен құбырлар бөлшектелді. №12 қазандық агрегатында бу салқындатқыш пен бу құбырларын орнату жүріп жатыр. Ал №13 қазандықта алдыңғы экран құбырлары құрастырылып, №9 турбинаға күрделі жөндеу басталған.
№11 қазандыққа баратын бу құбырына қатысты жұмыстар аяқталып, есепке қойылды. №12 қазандыққа баратын құбыр желісіндегі жұмыстар таяуда тиянақталады.
Сонымен қатар жерасты өндірістік су құбырлары жаңартылып, бетон құю және жер қазу жұмыстары жүргізіліп жатыр. №5 жаңа күл үйіндісінде де жер қазу мен геомембрана төсеу жұмыстары атқарылды.
Жөндеу жұмыстарын «Өскемен ЖЭО» ЖШС басшылығы ұдайы бақылауда ұстап отыр.
