Шығыс Қазақстан облысының әкімі Нұрымбет Сақтағанов Өскемендегі дарынды балаларға арналған мамандандырылған «БІЛІМ-ИННОВАЦИЯ» лицейіне арнайы барып, білім ордасының тыныс-тіршілігімен танысты, деп хабарлайды F16.kz.
Өңір басшысы сапар барысында оқу кабинеттерін, спорт залын, асхана мен жатын бөлмелерді аралап көріп, инфрақұрылымның қазіргі жай-күйін бағамдады. Бүгінде 140 орынға есептелген лицейде 225 оқушы білім алып жатыр. 1961 жылы іргесі қаланған ғимарат кезінде балабақша ретінде салынғандықтан, қазіргі заманғы білім беру стандарттарына толық сай келмейді. Осы ретте аймақ басшысы сапалы білім заманауи жағдайды талап ететінін айтып, балалардың жайлы ортада оқуы басты назарда екенін қадап айтты.
Біздің күшіміз – білімде. Ал балалар жайлы жағдайда білім алуы керек, – деді Нұрымбет Сақтағанов.
Ғимараттың тарлығы мен инфрақұрылымдық шектеулерге қарамастан, лицей шәкірттері жоғары көрсеткіштерге қол жеткізіп келеді. Оқушылар республикалық және халықаралық деңгейдегі олимпиадаларда облыс намысын абыроймен қорғап жүр. Лицей мақтаныштарының қатарында химиядан халықаралық IChO олимпиадасының күміс жүлдегері Нұрлыхан Көпенов, биологиядан IBO қола жүлдегері Нұртөре Төреханұлы және математикадан халықаралық додалардың алтын медаль иегері Алдияр Амангелді бар. Сондай-ақ Денис Айнабеков, Мади Ғазиз және Бекзат Есімхан сынды оқушылар да зияткерлік байқауларда жеңіс биігінен көрінді. Лицей директоры Рахман Оксюздің айтуынша, мұнда оқу процесінен бөлек, шахмат, спорт және шығармашылық бағыттарға, сондай-ақ мәдени іс-шараларға ерекше басымдық беріледі.
Лицейдің білім жетістіктерін ескере отырып, аймақ басшысы Нұрымбет Сақтағанов маңызды шешім қабылдады. Өскеменнің 22-ші тұрғын ауданында бой көтеретін 1200 орындық жаңа ғимарат «БІЛІМ-ИННОВАЦИЯ» лицейіне берілетін болды. Жоба бойынша кешен 600 ұл мен 600 қызға арналады және оның құрамына 400 орындық екі интернат-жатақхана кіреді. Қазір оған 6 гектардан асатын жер телімі бөлініп, жоба тиісті органдарда келісу кезеңінен өтіп жатыр. Жаңа нысан пайдалануға берілгенде дарынды балаларға толыққанды білім ортасы қалыптасып, өңірдегі адами капиталды дамытуға жаңа серпін бермек.
