Өскемен қаласындағы жаратылыстану-математика бағытындағы Назарбаев Зияткерлік мектебі базасында «Білім берудегі жаңашылдық: тәжірибе және ықпал ету» тақырыбында аймақтық ғылыми-практикалық конференция өтті, деп хабарлайды F16.kz.
300-ден астам педагогті бір арнаға тоғыстырған конференцияның мақсаты — білім беру саласындағы заманауи жаңашыл тәжірибелерді талқылау, педагогтердің кәсіби дамуына ықпал ететін тиімді әдістермен бөлісу және білім беру жүйесіндегі өзгерістердің нақты әсерін көрсету.
Іс-шара офлайн және онлайн форматта ұйымдастырылып, еліміздің барлық өңірлерінен 200-ден астам педагог тыңдаушы ретінде қатысты. Сондай-ақ 100-ге жуық болашақ ұстаздар, яғни мұғалім мамандығында білім алып жатқан студенттер арнайы шақыртумен қатысты. Конференция алаңы тәжірибе алмасуға, кәсіби диалог орнатуға және жаңа идеяларды талқылауға мүмкіндік берді.
Конференцияға офлайн форматта арнайы қонақ – спикерлермен қатар 219 педагог-спикер қатысып, өздерінің практикалық тәжірибелерімен бөлісті.
