Биылғы 30 қаңтардан бастап Өскемендегі ең ірі жол айырығында көлік қозғалысы өзгереді. Сәтпаев, Есенберлин даңғылдары мен Жібек жолы, Базовая көшелерінің қиылысында айналма қозғалыс жүйесі іске қосылады, деп хабарлайды F16.kz.
Осы өзгеріске байланысты орталықтан КШТ шағын ауданына қарай тікелей жүруге уақытша тыйым салынады. Енді бұл аумақта көліктер тек айналма жолмен жүретін болады.
Сонымен қатар жүргізушілерге ыңғайлы болу үшін оңға бұрылатын қосымша жолдар қарастырылған. Атап айтқанда, Сәтпаев даңғылынан Жібек Жолы көшесіне және Базовая көшесінен Сәтпаев даңғылына қарай бұрылу мүмкіндігі сақталады.
Осымен жобаның бірінші кезеңі аяқталады. Яғни, оңға бұрылу жолдары мен айналма жолдың құрылысы толық бітеді. Бұдан кейін жобаның екінші кезеңінде екі деңгейлі жол айырығының құрылысы басталады, ол келер жылдың соңына қарай аяқталады деп жоспарланып отыр.
Қала билігі жүргізушілер мен жол қозғалысына қатысушыларды қозғалыстың жаңа тәртібін ескеріп, орнатылған жол белгілеріне мұқият болуға шақырады.
