Өскеменде шілдеден бастап әлеуметтік көмір сатыла бастады. Қыста ерте қамданатын жұрт қатты отынды қаладағы төрт темір жол тұйығынан сатып ала алады, деп хабарлайды F16.kz.
Биыл әдеттегідей, қала әкімдігі, «Қаражыра» АҚ және облыстық «Ауған соғысы мүгедектері мен ардагерлері» қоғамдық бірлестігі арасында көмірді төмендетілген бағамен сату жөніндегі меморандумға қол қойылды. Қазір әлеуметтік көмір «Терминал Отын Компаниясы» ЖШС-да 15700 теңгеден, ал «Сейком» ЖШС темір жол тұйығында 16200 теңгеден сатылып жатыр.
Әлеуметтік көмірді қалай алуға болады?
Әлеуметтік көмірді алу үшін тұрғылықты мекен жайыңыз бойынша аумақтық басқару орталықтарына барып, өтініш беру керек.
«Ауған соғысы мүгедектері мен ардагерлері» ҚБ қатты отынды арзан бағамен жеткізіп береді.
Қала әкімдігі күз келіп, күн суығанда дүрбелеңге тап болмас үшін көмірді қазірден бастап ала беру керектігін айтады.
