Өскемен гарнизонының әскери қызметшілері бүгін Парламент палаталарының бірлескен отырысына қатысқан Президент Қасым-Жомарт Тоқаевтың Қазақстан халқына Жолдауын ұжыммен тыңдады, деп хабарлайды F16.kz.
Мемлекет басшысы Жолдауда маңызды міндеттер мен стратегиялық бағыттарды белгілеп, оларды жүзеге асыру үшін нақты тапсырмалар жүктеді. Оның ішінде цифрлық даму, аграрлық қауіпсіздік, құрылымдық және институционалдық өзгерістер, жалпы алғанда халықтың әлеуметтік-экономикалық жағдайы туралы сөз қозғады.
Бүгінгі Жолдауда Мемлекет басшысы елді үш жылдың ішінде жаппай цифрлық елге айналдыруды тапсырды. Жасанды интеллекті әр салада қарқынды қолданудың маңыздылығын да атап өтті. Біз бұл Жолдаудың маңыздылығын және оның қорғаныс секторына тікелей әсерін көріп отырмыз. Цифрлық жүйелерді енгізу мен ресурс тасымалындағы реформалар (мысалы, Smart-cargo) әскери логистиканы, жазбаларды басқаруды, сондай-ақ кадрлық үдерістерді жеңілдетіп, қызмет тиімділігін арттырады, — деді 27943 әскери бөлім командирі подполковник Жаннұр Саткынов.
Гарнизон өкілдері Жолдау шеңберінде көрсетілген барлық бастамаларды қолдауға дайын екендіктерін жеткізді.
