Бүгін Өскеменде Ауған соғысында қаза тапқан жауынгерлерді еске алып, майдангерлер рухына тағзым етті. Монументке гүл шоқтарын қойды, деп хабарлайды F16.kz.
Биыл кеңес армиясының Ауғанстан жерінен шығарылғанына 37 жыл болды. Ертіс жағалауындағы ескерткіш басына жиылған қауым қан қасапта мерт болған жауынгерлерді бір минут үнсіздікпен еске алды.
Мұндай шаралар тарихты жадымызда сақтап, жас ұрпақты отансүйгіштікке тәрбиелеуде өте маңызды.. Қатарымызда жастарға үлгі болатын ардагерлер барын мақтан тұтамыз, – деп сөйледі ШҚО ТЖД бастығының орынбасары Исхар Савазов көпшілік алдында.
Қалалық мәслихаттың төрағасы Александр Светаш интернационал жауынгерлердің ерлігі ел жадында мәңгі сақталатынын айтты.
Бұл күнді біз жыл сайын атап өтеміз. Ауғанстан жерінде өзінің азаматтық, әскери борышын абыроймен атқарған жерлестеріміздің ерлігін ешқашан естен шығармаймыз, – деді ол.
Тимур Чанышев – Ауғанстандағы қарулы қақтығыстың ортасында болған, қанқұйлы соғысты көзбен көргендердің бірі. Ол Гардез қаласында жеке десанттық-шабуылдау бригадасында екі жыл әскери борышын өтеген. Қазір төтенше жағдайлар департаментінде қызмет етіп жүр.
Ауған соғысы ардагерлерінің ерлігі ел жадынан өшпейді. Олардың рухына құрмет көрсету – тарих алдындағы парыз әрі патриоттық тәрбиенің маңызды бөлігі, – дейді ардагер.
