Бүгін, 20 желтоқсанда облыс орталығының тұрғындары мен қонақтары сол жағалау этносаябағына жиылды. Мұнда Жаңа жыл мерекесінің басты кейіпкері Аяз ата мен ақшақардың резиденциясы ресми түрде ашылды, деп хабарлайды F16.kz.
Бұл күні этносаябақта нағыз ертегідегідей атмосфера орнады. Төңірек әуелеген әнмен көмкеріліп, күмбірлеген күйге бөленді. Балалар, балалар ғана емес-ау, үлкендер де Аяз атаны тағатсыздана күтті. Көп ұзамай Риддер шәрінен басталған Аяз аталар шеруі жолай Алтай альпісіне соғып, соңғы аялдама Өскеменге де жетті.
«Алтай альпісіндегі» серуен
Фестивальдің негізгі іс-шараларының бірі — Алтай альпісі тау шаңғысы базасы болды. Мұнда еліміздің түкпір-түкпірінен келген фристайлшылардың қатысуымен жаппай сырғанау өтті. Оларға «Аяз ата, Ақшақар – 2025» фестивалі аясында Аяз аталар мен ақшақарлар қосылды. Іс-шараға облыс тұрғындарымен қатар шетелдік қонақтар да қатысты.
Бұл тамаша жерде алғаш рет болып тұрмын. Әсерім өте керемет, табиғаты да өте сұлу. Бұл шара Өскемен қаласы мен облыс тұрғындарын біріктіріп, нағыз жаңа жылдық көңіл күй сыйлайды», – деді Өзбекстан Республикасының Қазақстандағы елшілігінің сауда-экономикалық мәселелер жөніндегі кеңесшісі Ислом Орифжонов.
Спорттық рух, ертегідей кейіпкерлер мен мерекелік атмосфера бұл күнді барлық қатысушылар мен қонақтар үшін ерекше есте қаларлықтай етті.
Мерекелік шеруге Қазақстанның түкпір-түкпірінен ғана емес, алыс-жақын шетелдерден адамдар қатысты дедік. Олардың ішіндегі ең белсенділерін Шығыс Қазақстан облысының әкімі Нұрымбет Сақтағанов марапаттап, Аяз ата резиденциясын ресми түрде ашты. Енді бұл жерде балалар мен ата-аналар Аяз атаға хат жазып, естелікке суретке түсіп, нағыз мерекелік көңіл күйді сезіне алады.
Бұдан кейін Аяз аталар шеруі орталық алаңға қарай бет алды. Республика алаңында мерекелік флешмоб ұйымдастырылып, артынша Өскеменнің басты шыршасы салтанатты түрде жағылды.
Айта кетейік, алдағы күндері облыста Президенттің және облысы әкімінің атынан балаларға арналған жаңажылдық шырша кеші өткізіледі.
