Өскеменде 2008–2009 жылдары туған жасөспірімдер арасында бокстан Қазақстан чемпионаты жалауын желбіретті. Шараның басталуына облыс әкімі Нұрымбет Сақтағанов қатысып, жас былғары қолғап шеберлеріне сәттілік тіледі, деп хабарлайды F16.kz.
Бұл чемпионат – елдің бүкіл спорт қауымдастығы үшін маңызды оқиға. Жас былғары қолғап шеберлері үшін бұл өз мінезін шыңдап, жарыс тәжірибесін жинақтап, болашақ жетістіктерге бастайтын үлкен мүмкіндік, – деді облыс әкімі.
Аймақ басшысының атуынша, өңірде спорт нысандарының саны жыл сайын көбейіп келеді. Қазір облыста 1600-ден астам спорт кешені жұмыс істесе, тағы бірнеше ғимараттың құрылысы жүріп жатыр. Тұрғындардың шамамен жартысына жуығы тұрақты түрде спортпен айналысады. Былтыр өңір көлемінде екі жарым мыңнан аса түрлі спорттық іс-шара ұйымдастырылған.
Шығыс Қазақстанда бокс қарқынды дамып келеді. Бүгінде 34 жаттықтырушының жетекшілігімен 1200-ге жуық жас спортшы дайындалып жүр. Соңғы жылдары өңір өрендері халықаралық жарыстарда да өздерін жақсы қырынан көрсетті. Бұл орайда Азия біріншілігінде жеңіске жеткен Шыңғыс Ахметов пен Теміралы Темірбаевтың жетістіктерін айтуға болады.
Облыс әкімінің айтуынша, өңірде Данабек Сужанов пен Миржан Рахимжанов сияқты танымал боксшылардың ізін жалғастырар жаңа буын өсіп келеді. Ол чемпионатқа қатысушыларға сенімділік, таза бәсеке және жақсы нәтиже тілеп, әр рингке шығу – ел спортының дамуына қосылған үлес екенін атап өтті.
