Өскеменнің Б.Александров атындағы спорт сарайында Металлургтер күніне арналған салтанатты іс-шара өтті. Жұмысшы мамандықтар жылы аясында ұйымдастырылған мерекелік кеште еліміздің экстрада жұлдыздары әннен шашу шашты, деп хабарлайды F16.kz.
Кәсіби мерекемен металлургтерді Шығыс Қазақстан облысының әкімі Нұрымбет Сақтағанов құттықтап, саланың аймақ және республика экономикасы үшін маңызын атап өтті.
«Казцинк» компаниясы – еліміздің түсті металлургия саласындағы көшбасшы. Сіздердің ұжым жоғары кәсіби мәдениет пен тұрақты дамуға ұмтылыстың жарқын үлгісі, – деді аймақ басшысы.
Іс-шара аясында «Қазцинк. Табыстар тарихы» атты корпоративтік байқаудың жеңімпаздары марапатталды. Оларға 500 мың теңгенің сертификаттары берілді. Сонымен қатар дәстүрлі «Ізгі жүрек» сыйлығы да табысталды. Қызды судан құтқарған Ұлттық ұлан сарбазы Жанасбек Пермабекке 1 миллион теңге көлемінде сыйақы мен мүсінше берілді. Бұл марапатты батыл әрекеттерімен көзге түскен студенттер Алмас Елемес пен Ерасыл Омарханов та иеленді.
Бұл – біздің үлкен отбасымыздың ортақ мерекесі. Біз еңбектегі жетістіктерді ғана емес, ерлік көрсеткен жандарды да ұлықтаймыз, – деді «Казцинк» ЖШС-ның бас директоры Жанат Жанботин.
Мерекелік бағдарлама түрлі ойындармен, фотозоналармен және концертпен жалғасты. Шараға эстрада жұлдыздары Рахман Сатиев, Жандәурен Аблаев және шетелдік әнші Maruv қатысты.
