Өскемендегі Maxi Mall сауда-ойын-сауық орталығында киокушинкай-кан каратэден облыстық турнир өтті. Жарысқа Шығыс Қазақстан және Абай облыстарынан 300-ден астам жас спортшы қатысып, шеберліктерін көрсетті. Турнирді өткізудегі басты мақсат – жастар арасында салауатты өмір салтын насихаттап, есірткіге қарсы мәдениетті қалыптастыру, деп хабарлайды F16.kz.
Жарыстың ең әсерлі сәттерінің бірі – әлем чемпиондары мен жекпе-жек өнерінің шеберлері қатысқан салтанатты шеру болды. Олар көрермендерге қатты заттарды сындыру тәсілдерін көрсетіп, көпшіліктің ерекше ықыласына бөленді.
Турнир қорытындысында жеңімпаздарды Шығыс Қазақстан облыстық полиция департаментінің есірткі қылмысына қарсы іс-қимыл басқармасының бастығы Абай Бақтияров марапаттады. Ол өз сөзінде спорт жастарды дұрыс жолға бағыттайтын, зиянды әдеттердің алдын алатын маңызды құрал екенін атап өтті.
Бұл турнир жас спортшылардың шеберлігін анықтап қана қоймай, спорттың, темірдей тәртіп пен қайсар рухтың өскелең ұрпақ үшін маңызды өмірлік бағдар екенін тағы бір мәрте дәлелдеді.
