Шығыс Қазақстан облысында қаржылық сауаттылықты арттыруға бағытталған акция ұйымдастырылмақ. «Заң және тәртіп» нарративін іске асыру аясында облыстық экономикалық тергеп-тексеру департаменті прокуратура және әкімдікпен бірлесіп, 16 сәуір күні Өскеменде «Стоп пирамида!» атты іс-шара өткізеді.
Акция сағат 15.00-де қала әкімдігі ғимаратында (Пермитин көшесі, 17) өтеді. Іс-шараға жалпы білім беретін мектеп мұғалімдері мен колледж оқытушылары қатысады деп жоспарланып отыр.
Ұйымдастырушылардың мәліметінше, жиын барысында қаржылық пирамидалардың негізгі белгілері, олардың жұмыс істеу тетіктері және азаматтарды алдау схемалары туралы түсіндіріледі. Сонымен қатар, мұндай заңсыз әрекеттердің алдын алу жолдары кеңінен талқыланады.
Іс-шараның ерекшелігі — қаржылық қауіпсіздік тақырыбы заманауи технологиялар арқылы да түсіндірілмек. Атап айтқанда, Қаржылық мониторинг агенттігінің AI-офицері — AI_DOS көмегімен арнайы лекциялық материал ұсынылады.
Мамандардың айтуынша, соңғы жылдары қаржылық пирамидаларға қатысты құқық бұзу деректері жиілеп, азаматтардың қаржылық сауаттылығын арттыру өзекті мәселеге айналып отыр. Осыған байланысты мұндай ақпараттық-түсіндіру шараларының маңызы артып келеді.
Ұйымдастырушылар бұқаралық ақпарат құралдары өкілдерін аталған акцияны ақпараттық тұрғыда жариялауға шақырады.
