Өскеменде көктемгі санитарлық тазалық жұмыстары күшейтілген режимде жүргізіліп жатыр. «Таза Өскемен» коммуналдық кәсіпорны ауа райының құбылмалы болуына қарамастан, қаланы ретке келтіру шараларын тоқтатпай, тәулік бойы жұмыс істеуге көшкен. Бұл – қыс мезгілінен кейінгі қалыпқа келтіру кезеңінде атқарылатын маңызды жұмыстардың бірі, деп хабарлайды F16.kz.
Қазір қала көшелерін, аулалар мен қоғамдық орындарды тазалауға 97 арнайы техника мен 180-ге жуық қызметкер жұмылдырылған. Мамандардың айтуынша, жұмыстар тек орталық көшелермен шектелмей, шалғайдағы шағын аудандарды, саябақтар мен скверлерді де қамтып отыр. Бұл қаланың барлық бөлігінде санитарлық жағдайды бір деңгейде ұстауға мүмкіндік береді.
Көктемдегі негізгі мәселенің бірі – еріген қар суы. Қазір қала көшелерінде көлшіктер пайда болып, тұрғындарға қолайсыздық тудыра бастады. Осыған байланысты коммуналдық бригадалар суды сору жұмыстарын жедел ұйымдастырып, тұрғындардан келіп түскен өтінімдерді шұғыл түрде орындап жатыр. Мәселен, Сағадат Нұрмағамбетов көшесінде жиналған қар суы қысқа уақыт ішінде толық сорылып, қозғалыс қалыпқа келтірілді.
Сонымен қатар қаладағы маңызды қоғамдық нысандарды ретке келтіру жұмысы да ерекше бақылауда. Славский жағалауындағы сквер мен Ұлы Отан соғысы ескерткіші маңында кешенді санитариялық тазарту жүргізіліп, жаңа маусымға дайындық басталды. Бұл орындар – тұрғындар мен қала қонақтары жиі келетін аймақ болғандықтан, олардың тазалығы мен көркіне ерекше мән беріледі.
Коммуналдық қызметтер тек тазалықпен шектелмей, инфрақұрылымды қалпына келтіру жұмыстарын да қатар алып жүр. Атап айтқанда, жарық бағаналары мен қоршаулар жуылып, жолдағы шұңқырлар уақытша жамалды. Сонымен бірге саябақтар мен жасыл аймақтар қоқыстан тазартылып, абаттандыру жұмысы қолға алынды.
Ауа райының құбылмалы болуы бұл жұмысқа белгілі бір деңгейде кедергі келтіріп түр. Кей күндері жауын-шашын мен температураның күрт өзгеруі жұмыс қарқынын бәсеңдетіп тастайды. Соған қарамастан, мамандар белгіленген жоспардан ауытқымауға тырысып жатыр. «Таза Өскемен» кәсіпорны басшылығының мәліметінше, қолда бар ресурстар шектеулі болғанымен, барлық жұмыс белгіленген мерзімде аяқталуы үшін қажетті шаралар қабылдануда.
«Таза Өскемен» кәсіпорны қала тұрғындарын уақытша қолайсыздықтарға түсіністікпен қарауға шақырады. Бүгінде су тасқынының алдын алу, көшелерді тазарту және санитариялық жағдайды жақсарту бағытындағы жұмыстар тәулік бойы жалғасады. Бұл шаралар ең алдымен тұрғындардың қауіпсіздігі мен жайлы өмір сүру ортасын қамтамасыз етуге бағытталған.
Бұл жұмыс алдағы уақытта да жүйелі түрде жалғасын табады. Қала билігі мен коммуналдық қызметтер жағдайды тұрақты бақылауда ұстап, атқарылып жатқан шаралардың барысы туралы тұрғындарды жедел хабардар етіп отырады.
