Өскеменде «Конфессияаралық және ұлтаралық саясат» тақырыбында маңызды кездесу өтті. Іс-шараға С.Аманжолов атындағы Шығыс Қазақстан университетінің оқытушылары мен студенттері қатысты, деп хабарлайды F16.kz.
Кездесудің басты қонағы – Халықаралық конфессияаралық және дінаралық диалог орталығының сарапшысы Дулат Жакиянов. Ол жиын барысында қатысушыларға еліміздегі «Діни қызмет және діни бірлестіктер туралы» заң нормалары, конфессияаралық татулықты сақтау, діни бірлестіктердің қызметі және діни толеранттылық принциптері жайлы кең көлемде түсінік берді.
Еркін пікір алмасу форматында ұйымдастырылған жиында университет жастары мен оқытушылар өздерін толғандырған сауалдарын ашық қойып, нақты әрі тұшымды жауап алды. Талқылау барысында діни сауаттылық пен радикалды идеологиялардан сақтану жолдары, Қазақстандағы діни бірлестіктердің құқықтық мәртебесі, жастар арасында діни экстремизмнің алдын алу, конфессияаралық келісімді сақтау, ұлтаралық татулық пен қоғамдық тұрақтылықтың маңыздылығы секілді тақырыптар қамтылды.
Дулат Жакиянов конфессияаралық келісім кез келген қоғамның бейбіт өмір сүруінің негізі, ал жастардың бұл үдерістегі рөлі ерекше екенін атап өтті. Оның пікірінше, жастар арасында діни сауаттылықты арттыру – тұрақты қоғам қалыптастырудағы маңызды қадам.
Іс-шара барысында университет оқытушылары мен мамандары да ойларын айтып, қазіргі қоғамдағы діни және этносаралық тұрақтылықтың рөліне тоқталды. Олар жастардың ақпаратты сыни тұрғыда қабылдай білуі мен діни мәселелерде шынайы әрі сенімді дереккөздерге сүйенуі қажеттігін жеткізді.
Жастар – еліміздің болашағы. Олардың діни және азаматтық сауаты неғұрлым жоғары болса, қоғам да соғұрлым тұрақты әрі берік болады, — деді кездесуге қатысушылар.
Қазақстан – көпұлтты әрі көпконфессиялы мемлекет. Түрлі сенімдер тоғысқан елде өзара сыйластық пен төзімділікке негізделген саясатты жүргізу аса маңызды. Сол себепті осындай кездесулердің жастар арасында тұрақты өткізіліп тұруы – ел ішіндегі бейбітшілікті сақтауға зор үлес қосады.
Іс-шара соңында студенттер конфессияаралық келісім мен ұлтаралық татулықты нығайтуға бағытталған бастамаларды қолдауға дайын екендіктерін білдіріп, алдағы уақытта да осындай кездесулер жиі өтіп тұрса деген тілектерін жеткізді.
Айта кетейік, Қазақстанда конфессияаралық диалогты дамыту – ел саясатының басым бағыттарының бірі.
