Өскеменде тоғыз күнге созылған халықаралық «Oskemen Open 2026» шахмат фестивалі мәресіне жетті, деп хабарлайды F16.kz.
Ауқымды бәсекеде 16 елден келген 199 шахматшы шеберлік байқасты.
Фестивальдің басты бәсекесі саналатын Masters турнирінде 24 жастағы Андрей Есипенко (FIDE) топ жарып, 9 млн теңге көлемінде ақшалай сыйлыққа ие болды. Екінші орынға Полина Шувалова (FIDE) тұрақтаса, Давид Паравян (FIDE) үшінші орын иеленді. Қазақстандық шахматшылар арасында үздік нәтиже көрсеткен 17 жастағы Даниял Сапенов 12-орынға тұрақтады.
Бұл Қазақстанда қатысқан биылғы екінші классикалық турнирім болды. Ақтөбедегі жарыстан кейін Өскеменде жақсы нәтиже көрсете алдым. Тоғыз партияның бесеуінде жеңіске жетіп, төртеуінде тең түстім. Соңғы ойындарда көшбасшылықты сақтап қалу оңай болған жоқ, – деді Андрей Есипенко.
Masters турнирінде алғашқы 15 орыннан бөлек, бірнеше арнайы номинация бойынша да жеңімпаздар анықталды. Қазақстанның үздік ойыншылары ретінде Қазыбек Нөгербек, Алдияр Ансат және Әлішер Сүлейменов марапатталды. Сондай-ақ түрлі Эло рейтинг санаттары мен әйелдер арасындағы үздік шахматшыларға арнайы жүлделер табысталды.
Айта кету керек, Masters додасында барлығы 77 спортшы бақ сынады. Олардың қатарында 22 халықаралық гроссмейстер (GM), бір әйелдер арасындағы халықаралық гроссмейстер (WGM) және 29 халықаралық шебер (IM) бар.
Ал Open турнирінде Шымкенттің өкілі Әбілмансұр Әбділхаиыр жеңімпаз атанды. Күміс жүлдені семейлік Арыстан Исанжулов, қола жүлдені павлодарлық Владислав Малыгин иеленді.
Әбілмансұр Әбділхаиырдың айтуынша, жарыстың ең шешуші сәті сегізінші турда болған.
Партияның басында қарсыласымның басымдығы байқалды. Бірақ ол мүмкіндігін пайдалана алмады. Соның арқасында партмяны өз пайдама өзгертіп, жеңіске жеттім. Турнирдегі қарсыластарымның бәрі өте мықты болды, – дейді ол.
Биылғы фестиваль ерлер мен әйелдер арасындағы классикалық шахматтан Қазақстан Кубогінің екінші кезеңі саналады. Жалпы жүлде қоры 50 млн теңгені құрады. Оның ішінде Masters турниріне – 45 млн теңге, Open турниріне – 5 млн теңге бөлінді.
Қазақстан Кубогінің үшінші кезеңі 12–20 қазан аралығында Атырауда өтсе, финалдық жарыс желтоқсан айында Астанада ұйымдастырылады.
Шығыс Қазақстан облыстық шахмат федерациясының атқарушы директоры Алекс Кудиновтың айтуынша, Oskemen Open бүгінде өңірдің дәстүрлі халықаралық турниріне айналған.
Бұл жарыс жас шахматшыларға әлемдік деңгейдегі гроссмейстерлермен бір алаңда ойнауға мүмкіндік береді. Алдағы жылдары турнирдің ауқымы одан әрі кеңейіп, қатысушылар саны арта түседі деп сенеміз, – деді Алекс Кудинов.
Айта кетейік, «Oskemen Open» халықаралық шахмат фестивалі Өскеменде қатарынан үшінші жыл ұйымдастырылып отыр.
