Жаңажылдық мереке күндері Өскемендегі бірқатар медициналық мекеме штаттық режимде жұмыс істеді. Мереке қарсаңында және демалыс күндері тұрғындардың жарақат алуы жиілеп, әсіресе травматология пунктіне жүгінгендер саны айтарлықтай артқан, деп хабарлайды F16.kz.
Төрт күнде, яғни 1–4 қаңтар аралығында, медициналық көмекке 300-ден астам қала тұрғыны жүгінген.
1 қаңтардан бері травматология пунктіне барлығы 341 адам жүгінген. Оның ішінде 270 адам көше жарақатын алған, 2 адам жол-көлік оқиғасы салдарынан, ал 6 адам пиротехникалық бұйымдарды пайдалану кезінде зардап шеккен, — деп мәлімдеді облыстық денсаулық сақтау басқармасының баспасөз қызметі.
Мамандардың айтуынша, жарақаттардың негізгі түрлеріне сүйек сынуы, буынның шығуы, созылу, соғылу және түрлі жұмсақ тіндердің зақымдануы жатады. Әсіресе, мерекелік отшашуларды абайсыз қолдану салдарынан жарақат алу жағдайлары тіркеліп отыр.
