Өскемен қаласының прокуратурасы мен полиция басқармасы тұрғындармен тікелей байланыс орнатуға негізделген құқық бұзушылықтың алдын алу бойынша жаңа тәсілді қолданысқа енгізді, деп хабарлайды F16.kz.
Бұл модельдің негізгі мақсаты – қоғамдағы күмәнді немесе қауіпті жағдайларды дер кезінде анықтап, жедел әрекет ету.
Көп жағдайда тұрмыстық жанжал, алкогольді шамадан тыс ішу, нашақорлар пайналаған пәтерлер, қараусыз қалған балалар немесе тұрғындардың қоғамға жат қылықтары ең алдымен көршілердің көзіне түседі. Сондықтан мұндай оқиғаларды назардан тыс қалдырмау үшін қалада 23 жұмыс чаты құрылды. Бұл чаттар учаскелік тірек пункттерінің санына сәйкес жасақталған.
Әр чатта прокуратура мен полиция қызметкерлері, ПИК, МИБ, ҚС өкілдері және белсенді тұрғындар бар. Мұндай байланыс форматы маңызды ақпаратты жылдам жеткізуге және құқық қорғау органдарының дер кезінде шара қолдануына мүмкіндік береді.
Қоғамдық тәртіпті сақтауға үлес қосып, белсенділік танытып жүрген барлық тұрғындарға алғыс жарияланды.
