Биылғы 20–24 сәуір аралығында Қазақстанда 47-ші республикалық орындаушылар байқауы өтеді. Ббайқаудың басты алаңы ретінде Өскемен қаласы таңдалып отыр, деп хабарлайды F16.kz.
Ауқымды мәдени шара Мәдениет және ақпарат министрлігі Мәдениет комитетінің қолдауымен ұйымдастырылмақ. Оған еліміздің барлық өңірлерінен іріктеуден өткен музыкалық колледж студенттері қатысып, түрлі бағыттар бойынша өзара бақ сынайды. Негізгі және ең кең ауқымды бағдарлама дәл Өскеменде болады. Мұнда қатысушылар халықтық және аспаптық мамандықтар бойынша өнер көрсетеді, жас орындаушылардың шеберлігі сарапқа салынады. Бұл күндері Шығыстың бас шаһары бірнеше күн бойы республиканың түкпір-түкпірінен келген дарынды жастардың шығармашылық орталығына айналады.
Сонымен қатар байқаудың жекелеген номинациялары Қарағанды, Ақтау, Көкшетау, Алматы, Қызылорда, Шымкент және Астана қалаларында ұйымдастырылады.
Байқаудың негізгі мақсаты — дарынды жас орындаушыларды анықтау және қолдау, музыкалық мәдениетті дамыту, сондай-ақ өңірлер арасындағы мәдени байланысты нығайту. Ұйымдастырушылардың айтуынша, бұл жоба жастардың кәсіби өсуіне және шығармашылық әлеуетін арттыруға мүмкіндік береді.
Айта кетейік, республикалық кезеңнің жеңімпаздарына Қазақстанның шығармашылық жоғары оқу орындарына түсу кезінде жеңілдіктер қарастырылған.
Байқауды Мәдениет комитеті мен Күләш Байсейітова атындағы Қазақ ұлттық өнер университеті бірлесіп қолға алып отыр.
Өнер додасы Өскемен қаласының 30-шы Гвардиялық дивизия көшесі, 6 мекен жайындағы №2 оқу корпусында өтеді.
