Жыл сайын дәстүрлі түрде ұйымдастырылатын Өскемендегі ретро-кеш биыл 28 тамыз күні өтеді, деп хабарлайды F16.kz.
Бейсенбінің кешінде Достық үйінің алдында сонау 70-ші, 80-ші, 90-шы және 2000-шы жылғы әндер шырқалып, автокөліктер көрмесі мен қызықты байқаулар болады. Дресс код – ретро стиль.
Конституция күні мен қала күні аясында қызықты ойын-сауық бағдарламалар, фотозоналар мен байқаулар ұйымдастырылады. Ретро-кешке үздік образ дайындаған қала тұрғындарына сыйлықтар табысталып, жиналғандар ретро көліктермен суретке түсе алады, — дейді қала әкімдігі.
Айта кетейік, бұған дейін шара ұйымдастырушылары кеш сағат 19.00-де басталатынын хабарлаған. Кейінірек басталу уақыты бір сағат алға жылжытылды. Қала тұрғындары мен қонақтары 28 тамыз күні сағат 18.00-де Достық үйінің алдында өтетін өзгеше кештің куәсі бола алады.
