Өскемендегі «бірінші қалалық аурухананың» травматология бөлімшесінде жөндеу жұмыстары аяқталды. Мұнда дәрігерлер мен науқастар үшін қолайлы жағдай жасалып, палаталар жөнделіп қана қоймай, инженерлік желілер толықтай жаңартылды, деп хабарлайды F16.kz.
Облыстық мамандандырылған медициналық орталық – өңірдегі басты мекемелердің бірі. Естеріңізге сала кетейік, бұған дейін ШҚО әкімінің бірінші орынбасары Жақсылық Омар нақты іс-қимыл жоспары әзірленіп, мекемедегі қызмет сапасын арттыру, мамандармен жұмыс істеу, инфрақұрылымды жақсарту жөніндегі шаралар қабылданатынын айтқан.
Травматология бөлімшесіне күрделі жөндеу жұмыстары жүргізілді. Біздің міндет – тұрғындарға сапалы медициналық қызмет көрсету үшін аурухананы кезең-кезеңімен ретке келтіру. Мемлекет басшысы Қасым-Жомарт Тоқаев Қазақстан халқына Жолдауында денсаулық сақтау саласын дамытуға мемлекет тарапынан жүйелі шаралар қабылданып жатқанын ерекше атап көрсетті. Бүгінде елде ауылдық жерлердегі фельдшерлік-акушерлік пункттерден бастап, мамандандырылған ауруханаларға дейін кезең-кезеңімен жаңғыртылып жатыр, — дейді Жақсылық Омар.
Сондай-ақ облыс әкімінің орынбасары өз сөзінде дәрігерлердің өтініші бойынша бөлімшеге қажетті құрал-жабдықтар сатып алу мәселесін де қарастыратынын атап өтті.
