Облыс орталығында гематология орталығының құрылысы әлі жалғасып жатыр. Қазіргі уақытта нысанда жүргізіліп жатқан жұмыстарды қалалық прокуратура бақылауына алды, деп хабарлайды F16.kz.
Естеріңізге сала кетейік, орталықтың құрылысы 2022 жылы басталған. Жоспар бойынша 2024 жылы аяқталып, қолданысқа берілуге тиіс еді. Алайда жоспар орындалмады. Құрылысы ұзаққа созылған нысанның жалпы құны осылайша 71,3 миллиард теңгені құрады.
Мемлекет басшысы Қасым-Жомарт Тоқаев мемлекетке қайтарылған қаражат есебінен медициналық нысанды қаржыландыруға тапсырма берген. Бүгінде қайтарылған активтер есебінен қосымша 33,6 миллиард теңге қарастырылып, құрылыс жалғасып жатыр.
Өскемен қаласының прокуратурасы бұл қаражаттың заңды және мақсатты пайдаланылуын, сондай-ақ құрылыс жұмыстарының сапасын бақылауда ұстайды. Бүгінде нысанда ішкі әрлеу және инженерлік жүйелерді орнату жұмыстары жүргізіліп жатыр, — дейді қалалық прокуратураның баспасөз қызметі.
Айта кетейік, гематологиялық орталықта қан ауруларына шалдыққан адамдар медициналық көмек ала алды. Нысан бірнеше корпусты қамтиды. Химиотерапия күндізгі стационары, балалар стационары, соматика, ересектер гематологиясы, кардиология және кардиохирургия, сондай-ақ сүйек кемігін трансплантациялау бөлімшелері болады.
