Шығыс жұрты Конституцияның 30 жылдығы мен Қала күнін есте қалатындай етіп өткізді. Бірнеше күнге созылған мерекелік шаралар легі 30 тамызда Өскеменнің Республика алаңында қазақ эстрадасы жұлдыздарының концертімен түйінделді, деп хабарлайды F16.kz.
Жылдағы дәстүрге сай тамыздың соңында облыс орталығы әдеттегідей мерекелік көңіл-күйге бөленіп, ерекше сән-салтанатпен безендіріледі. Қала тұрғындары мен қонақтары үшін бұл күндер әсерлі оқиғаларға толы болады. Биыл да дәл солай болды. 30 тамыз — Қазақстан Республикасының Конституциясы күнімен қатар Қала күні аптаға жалғасқан мәдени-спорттық іс-шаралармен аталып өтті.
Мерекелік апталық 24 тамызда басталып, 30 тамызда гала-концертпен өз мәресіне жетті. Апта бойы Өскемен көшелері мен алаңдары ән мен күйге, жарқын күлкі мен қуанышқа тұнып тұрды. Қаланың түкпір-түкпірінде түрлі форматтағы көрмелер, спорттық жарыстар, балаларға арналған ойын-сауық бағдарламалары, театрландырылған қойылымдар ұйымдастырылды.
Ал мерекенің шарықтау шегі — орталық алаңда өткен концерт болды. Бұл кеш нағыз халықтық думанға айналды. Қарақұрым халық алаңға жиналып, думанды кешті бір кісідей тойлады. Жиналған қауым тек тамашалап қоймай би билеп, әншілерге қосылып ән салды, ойындарға белсенді қатысты.
Сахнаға алдымен жергілікті өнерпаздар шықты. Олардың орындауындағы патриоттық әндер мен заманауи туындылар көрерменнің зор қошеметіне ие болды. Бұдан кейін кеш тізгінін кәсіби жүргізушілер Анара Батырхан мен Dake алып, мерекелік атмосфераны одан әрі жандандыра түсті.
Танымал қазақстандық әртістер JAZZDAUREN, Ғазизхан Шекербек, Нұрсұлтан Нұрбердиев, Диана Исмаил, Жігер Ауыпбаев, Ажар Назар, Ақтоты Болшова, сондай-ақ Сейфуллин Жолбарыс сынды белгілі есімдер де сахна төріне шығып, нағыз шоу сыйлады.
Әсіресе Alem-нің өнерін жұрт ерекше ықыласпен қарсы алып, қошеметпен қол соқты.
Мерекенің шарықтау шегі — қаланың аспанын жарыққа бөлеген керемет отшашу шоуы.
Қазақстан Республикасы Конституциясының 30 жылдығы мен Өскемен қаласының күніне орай ұйымдастырылған мерекелік апта мәдени бірліктің шынайы символына айналды. Жарқын әсерлер, шынайы қарым-қатынас пен ортақ мерекелік көңіл күй – бұл сәттер қала тұрғындарының есінде ұзақ сақталары сөзсіз.
