Шығыс Қазақстан облысы төтенше жағдайлар департаментінің қызметкері Ерзат Сақабанов «Ұлы дала батыры» турнирінде жеңіске жетіп, чемпиондық белбеуді беліне тақты, деп хабарлайды F16.kz.
Батырлар турнирі Өскеменнің көрікті жерлерінің бірінен саналатын Үлбі жағалауында өтті. Ашық аспан астындағы алаңда ұйымдастырылған жекпе-жекті тамашалауға келген жұрттың қарасы тым көп болды. Жарыс қожайыны Ерзат Сақабанов 61 келі салмақ дәрежесінде сынға түсті. Ол Өзбекстан елінен келген файтер Мираваз Миржалоловпен күш сынасты. Тартысты өткен жекпе-жек нәтижесінде табандылық пен шеберлігін паш еткен өскемендік спортшы жеңіске жетіп, турнирдің титулдық белбеуіне ие болды.
