Өскемендегі Назарбаев зияткерлік мектебінің математика пәні мұғалімі Бақыгүл Раисова республикалық «Педагогикалық идеялар фестивалі» аясында өткен байқауда І орынды жеңіп алды. Алматы қаласындағы СДУ университетінде өткен фестивальге еліміздің түкпір-түкпірінен 244 педагог қатысты, деп хабарлайды F16.kz.
НЗМ баспасөз қызметінің мәліметінше, Бақыгүл Раисованың «Шеберлік палитрасы» бағыты бойынша ұсынған «STEAM және Desmos – математиканы концептуалды түсінудің тиімді моделі» атты жұмысы жоғары бағаланған. Зерттеу STEAM-педагогика мен Desmos цифрлық платформасын кіріктіру арқылы оқушылардың зерттеушілік, шығармашылық және аналитикалық ойлау қабілеттерін дамытуға бағытталған.
Жоба 7–12-сыныптарда «Функциялар» бөлімін оқыту барысында жүзеге асырылып, Desmos графикалық калькуляторының көмегімен функцияларды динамикалық зерттеу, параметрлерді өзгерту және нақты математикалық модельдер құру мүмкіндігі қарастырылған.
Зерттеу нәтижесінде оқушылардың пәнге қызығушылығы артып, математикалық ұғымдарды терең әрі визуалды түрде түсіну деңгейі жоғарылағаны анықталды. Сонымен қатар ұлттық мәдени элементтерге негізделген 2400-ден астам математикалық функция арқылы шығармашылық графикалық жұмыстар орындалған.
Аталған жұмыстың тиімділігі оқушылардың «Graphicon 2025» республикалық байқауында бірінші орын алуы және SAT математика бөлімінен 97–100% нәтиже көрсетуі арқылы дәлелденді. Бұл жоба STEAM-педагогика мен цифрлық технологияларды ұштастырған озық тәжірибе ретінде білім беру саласына зор үлес қосады.
