Өскеменде қазақтың ұлы ойшылы, бас ақыны әрі ағартушы Абай Құнанбайұлының 181 жылдығына арналған «Ұлы Абайдың мұрасы – ұрпаққа аманат» атты қалалық байқау өтті, деп хабарлайды F16.kz.
Дәстүрлі түрде ұйымдастырылатын шараға қала мектептерінің педагогтері, филологтар, қазақ тілі мен әдебиеті пәнінің мұғалімдері қатысты.
Ұйымдастырушылардың айтуынша, мұндай байқаулар мұғалімдердің шығармашылық қабілетін шыңдаумен қатар, ақынның әдеби және рухани мұрасын тереңірек зерделеуіне мүмкіндік береді.
Өткен жылдарға қарағанда, биыл қатысушылар саны едәуір артып, байқаудың ауқымы да кеңейіп келеді. Яғни, Ұлы Абайдың шығармаларын ұлықтау, дәріптеу, жас ұрпаққа насихаттау жылдан жылға қарқын алып келеді. Бұл шара тек ұстаздарға арналады. Себебі тіл мен әдебиет мұғалімі Абайды жете тануы керек. Сонда ғана ол оқушылардың, артымыздан еріп келе жатқан жаңа буынның ойына сіңіре алады, – деді облыстық білім басқармасының әдіскері Альмира Қабидолдина.
Байқау барысында ұстаздар Абайдың өлеңдері мен қара сөздерін оқып, бірі әнін шырқаса, енді бірі театр өнері арқылы таныстырып, ақын мұрасын жаңа қырынан ашуға тырысты.
Абайдың білім, еңбек, адамгершілік, тәрбие мен ізгілік туралы ойлары бүгінгі күні де өзектілігін жоғалтқан жоқ. Сондықтан мұндай мәдени шаралар ақын мұрасын насихаттап қана қоймай, жас ұрпақтың ұлттық әдебиетке деген қызығушылығын арттыруға ықпал етеді.
Биыл байқауға 30-дан астам ұстаз қатысып, өз бағын сынап көрді. Өзім бұл шараға алғаш рет қатысып жатырмын. Қазақтың бас ақынының шығармашылығы өзектілігін жойған жоқ. Сондықтан әрқайсымыз үшін осындай шаралардың маңызы зор. Ұлы Абайдың мұрасы қай уақытта болса да дәріптелуі керек, – дейді №49 жалпы білім беретін мектебінің қазақ тілі мен әдебиеті пәнінің мұғалімі Маржан Мұратбекқызы.
«Ұлы Абайдың мұрасы – ұрпаққа аманат» байқауы ұлы ақын шығармаларының бүгінгі қоғамда да кеңінен насихатталып келе жатқанын көрсетті. Ақынның өлеңдері мен әндері орындалып, шығармалары сахналанып, оның идеялары ұстаздар арқылы жас ұрпаққа жеткізілді.
Байқауға қатысқан барлық педагогке шараға қатысқаны үшін сертификаттар табысталды.
