Өскемендегі Назарбаев зияткерлік мектебінің ұстаздары әзірлеген жоба Латвияда өтетін Еуропадағы ғылым мен техниканы оқытудың инновациялық фестиваліне жолдама алды, деп хабарлайды F16.kz.
Биология пәні мұғалімі Малика Бағланқызы мен өнер пәні мұғалімі Альмира Рысбекқызы ұсынған «Seed Capsule Box: экологиялық білім беру құралы ретінде қағаз қалдықтарынан жасалған биоыдырайтын капсулалар» жобасы экологиялық білім берудің тың үлгісі ретінде бағаланды. Жоба қағаз қалдықтарынан жасалған экокапсулалар арқылы жас ұрпаққа табиғатты қорғаудың маңызын тәжірибелік жолмен түсіндіреді. Бұл әдіс оқушыларды ғылымға тартып қана қоймай, олардың экологиялық мәдениетін қалыптастыруға зор ықпал етеді, — деп хабарлады НЗМ баспасөз қызметі.
Сонымен қатар мектебімізден қатысқан физика пәні мұғалімдері Назым Нұрсыдыққызы мен Кристина Александровна әзірлеген «STEAM-vengers: әлемді ғылым құтқарады» атты жоба да көпшіліктің назарын аударды. Ойын элементтерімен ұштасқан ғылыми тәжірибе арқылы балаларды шығармашылыққа баулып, әлемдік мәселелерді ғылым көмегімен шешуге бағыттайды.
Ұлттық кезеңнің қорытындысы бойынша үздік деп танылған «Seed Capsule Box: экологиялық білім беру құралы ретінде қағаз қалдықтарынан жасалған биоыдырайтын капсулалар» жобасы Қазақстанды халықаралық деңгейде таныстыруға мүмкіндік алып отыр. Латвиядағы фестивальде қазақстандық педагогтер Еуропаның үздік ұстаздарымен қатар тұрып, тәжірибе алмасып, тың идеяларын әлемдік білім кеңістігіне ұсынбақ.
