Биылғы қыстың соңғы күні Өскемен іргесіндегі Шешек асуында отбасы фестивалі өтеді. Мерекелік шараға мұрындық болған қалалық ішкі саясат бөлімінің мәліметінше, бұл күні көпшілікке арналған қызықты ойын-сауық бағдарламалары ұйымдастырылады, деп хабарлайды F16.kz.
Шешектегі отбасы фестивалі 28 ақпан күні сағат 10.00 басталып кешкі 16.00-ге дейін жалғасады. Ол жерде бірнеше аймақ болады. Атап айтқанда, балалар мен жасөспірімдерге арналған аумақта аниматорлар жұмыс істейді. Сол сияқты ойын-сауық бағдарламалары мен байқаулар, шеберлік сабақтары жоспарланған.
Ересектер де ескерусіз қалмайды. Қонақтарға дастархан жайылып, тәтті-дәмді, ыстық шай мен кофе, кәуап және басқа да тағамдар ұсынылады. Фотосуретке түсуді құп көретін жандарға арналған аймақтар да жасалған. Бұл қала тұрғындары үшін күнделікті күйбең тіршілікті бір сәт ұмытып, тамаша табиғат аясында сейілдеуге таптырмас мүмкіндік болмақ.
