Қазір Шығыстың бас шаһарында қала көшелерін, саябақтар мен аулаларды абаттандыру жұмыстары жүргізіліп жатыр. Қала әкімдігі бұған дейін жұмыстардың уақтылы аяқталуына және сапасына баса мән берілетінін айтқан, деп хабарлайды F16.kz.
Қала әкімінің баспасөз қызметі таратқан ақпаратқа сүйенсек, биыл шаһардағы 40 учаскені абаттандыру жоспарланса, оның жартысынан көбі «Халық қатысатын бюджет» бағдарламасы аясында жөнделеді.
Айта кетейік, соңғы жылдары аталмыш бағдарлама нәтижесінде көпқабатты үйлердің маңы абаттандырылып, тұрғындардың талап-тілектеріне сай қажетті инфрақұрылымдар салынып жатыр. Сондай аулалардың бірі – Красин, 8/1 және Мызы, 37 мекен жайындағы үйлердің ауласы.
Қазір Красин 8/1 мекен жайында жұмыстың 70 пайызы аяқталды. Жоспар бойынша, тамыздың аяғында қолданысқа берілуі керек болған. Бірақ уақытынан ерте, яғни айдың басында абаттандыру жұмысы толық аяқталады. Жалпы қала бойынша 10 учаскенің бүгінде 8-ін өткіздік, — деді мердігер Талап Болатханұлы.
Мызы, 37 мекен жайындағы көпқабатты үйдің бүлдіршіндері де жаңа ойын алаңының қызығын көретін күн алыс емес. Онда да қазір жұмыс қызып жатыр. Мердігер келесі аптаның аяғына дейін толық аяқтауды жоспарлап отыр.
Бүгінде қала бойынша 17 жиынтық шағын сәулет нысаны орнатылып, алаңдардың бетон негізі дайындалған. 3000 шаршы метр тақта тас төселіп, жалпы ауданы 5000 шаршы метр болатын сегіз футбол алаңының негізі дайын.
Аулаларды кешенді абаттандыру мақсатында аула өткелдерін жөндеу, автотұрақтарды кеңейту және орнату бойынша жұмыстар жоспарланған. Сонымен қатар аулалар арасындағы және квартал ішіндегі өткелдерге ағымдағы және орташа жөндеу жүргізілмек, — деді қала әкімінің баспасөз қызметі.
