Шығыстың бас қаласында Ұлыстың ұлы күні Наурыз мейрамы жаппай көкпармен жалғасты. Дүбірді додаға Тарбағатай, Ұлан, Самар, Күршім, Глубокое және өңірдің басқа да аудан-қаласынан, сондай-ақ Абай облысынан келген көкпаршылар қатысты. Ахмер ауылының іргесіндегі жазықта өткен көкпардан облыстың ашық лигасын ұйымдастыруға Тарбағатай ауданының азаматтар мұрындық болды. F16.kz журналистері ұлт мұрасын ұлықтаған ойыннан қызықты сәттерді таспаға түсірді.
Тастақым жігіттердің тартысы. Төреші ойынның ережеге сай өтуін, ең бастысы көкпаршылардың қауіпсіздігін қас қақпай қадағалап тұр.
Ұлттық ойынды ұлықтап жүрген құрыш білек азаматтардың қолына су құю да мәртебе.
Бағзыдан келе жатқан баба дәстүрін жалғайтын жас ұрпақ өсіп келеді.
«Көк Тудың желбіреген, Қазақтың асқақ беделі…»
Беташар салым салып, 120 мың теңге ақшалай сыйақымен бірге арнайы белбеуді иеленген Ұлан ауданы, Тоғанас ауылының көкпаршылары.
Өскеменде өтіп жатқан жаппай көкпарда алғашқы салым салып, арнайы белбеуді иелендім. Ойын өте тартысты өтіп жатыр, көкпаршылардың бәрі мықты. Облыстың ашық лигасына өңіріміздің Тарбағатай, Ұлан, Самар және басқа да аудандарынан, Абай облысынан жігіттер қатысып жатыр, – дейді Ұлан ауданының көкпаршысы Ернар Маратов.
Жаппай көкпарда екінші салым салып, жанкүйерлер қошеметіне бөленген Тарбағатай ауданының ойыншылары.
Салым салып, туған күнінде өзіне сыйлық жасаған тарбағатайлық Бауыржан палуан.
Өскеменде өткен жаппай көкпар ел рухын көтеріп, ұлт намысын асқақтатты.
Дүбірді доданы фотосуретке түсірген — Аяужан Утеулинова.
