Бүгін Өскеменнің АДК және Maxi Mall сауда орталықтарында әскери әуендер шырқалды. Жаңа жыл қарсаңында қала тұрғындары мен қонақтарына көтеріңкі көңіл күй сыйлаған бұл шара Бауыржан Момышұлының туғанына 115 жыл толуына орай ұйымдастырылды, деп хабарлайды F16.kz.
Шығыс Қазақстан облысы Қорғаныс істері департаментінің ұйымдастыруымен өткен іс-шараның басты мақсаты – ерлік жолын насихаттау, жас ұрпақтың бойында отансүйгіштік пен патриоттық рухты қалыптастыру.
Бұл күні Ұлттық ұланның «Шығыс» өңірлік қолбасшылығына қарасты 5518 әскери бөлімінің оркестрі, Қорғаныс істері департаментінің өнерпаздары, қалалық №24 орта мектебі «Жас сарбаздар» қозғалысының шәкірттері өнер көрсетіп, көпшілікке отан қорғау идеясы кеңінен дәріптелді. Әскери әуендер мен патриоттық композициялар тұрғындардың ерекше ықыласына бөленіп, көтеріңкі рух сыйлады.
Бауыржан Момышұлы – ерлік пен отансүйгіштіктің символы. Осындай іс-шаралар арқылы біз жас ұрпақтың бойына патриоттық рухты сіңіріп, елге қызмет етудің маңызын жеткіземіз. Әскери әуендер халықты біріктіріп, ұлттық рухты күшейтеді, — деді Қорғаныс істері жөніндегі департамент өкілі Әсет Адамбаев.
Тұрғындар Бауыржан атамыздың ерлік рухын еске алып, әуезді әуен арқылы жастар тағылымды тәрбие алды.
