Өскеменнің шағын аудандарында ірге көтерген жаңа мектептерге бала сыймай жатыр. Бұл туралы бүгін Шығыс Қазақстан облысы әкімдігінде өткен жиында айтылды, деп хабарлайды F16.kz.
Облыс әкімінің орынбасары Ербол Нұрғалиев жаңа шағын аудандардың әлеуметтік инфрақұрылымын жүргізгенде жергілікті халық санының өсімін ескеру қажеттігін атап өтті.
Былтыр «Нұрлы жол» шағын ауданында 600 орындық мектеп ашылды. Бүгінде сол ауданда тұрып жатқан балалар саны 2 мыңнан асып кетті. Қазір бізге оқушылардың орын тапшылығы мәселесін шешуге тура келіп отыр. Егжей-тегжейлі жоспарлау жобасын әзірлегенде осы жағы неге ескерілмеді? – деп сұрады облыс әкімінің орынбасары.
Облыстың құрылыс, сәулет және қала құрылысы басқармасының басшысы Руфат Акрамов қаланың бас жоспарында 19 егжей-тегжейлі жоспарлау жобасы қарастырылғанын, жетеуіне өзгерістер енгізілгенін айтты.
Биыл тағы төрт егжей-тегжейлі жоспарлау жобасына түзету енгізіледі, тиісті ақша бөлінді. Конкурс өткізіліп жатыр. Ал енді Спорт шағын ауданына келсек, жоба реттелді, мектеп салынатын жер учаскесіне қатысты мәселені шешу ғана қалды, – деді басқарма басшысы.
Аймақ басшысы Нұрымбет Сақтағанов туындаған мәселелерді жүйелі түрде шешіп, болашақта әлеуметтік нысандар салғанда міндетті түрде сол аумақтағы тұрғындар санын есепке алу қажеттігін ескертті.
