Биыл қоныс аудару бағдарламасы бойынша еңбек күші артық өңірлерден Катонқарағай ауданына 9 отбасы, барлығы 24 адам көшіп келді. Бұл туралы аудан әкімі Данияр Дюсембаев айтты, деп хабарлайды F16.kz.
Тағы 50 отбасы қазіргі күні аймақтық квота бөлінуін күтіп отыр.
Өзге өңірлерден қоныс аударушылар әр ауылға тұрақтап, тұрмыстарын қалыптастырып жатыр. 3 қазан күні біз Шымкенттегі «Бос жұмыс орындары» жәрмеңке қатысып келдік. Нәтижесінде, Шымкент қаласынан 286 адамнан тұратын 68 отбасы, Сарыағаш ауданынан 102 адамнан тұратын 24 отбасы көшіп келуге ниет білдіріп отыр, — дейді аудан әкімі.
Айта кетейік, 2023 жылғы статистикамен салыстырғанда қазір аудан халқының саны 280 адамға азайған. Аудан әкімінің айтуынша, соңғы жылы керісінше көшіп келушілер саны артып келеді.
Жеке аудан болып құрылғалы мемлекеттік қызметкерлер мен дәрігерлер де келіп жатыр. Алдағы уақытта халық саны артады деген үміттеміз, — деді ол.
