Ұлттық қауіпсіздік комитетінің сыбайлас жемқорлыққа қарсы іс-қимыл қызметі жыл басынан бері 126 қылмыс тіркеді. Оның 110-ы сыбайлас жемқорлыққа қатысты іс, деп хабарлайды F16.kz порталы ведомствоның баспасөз қызметіне сілтеме жасап.
Биылғы қаңтарда Ұлттық қауіпсіздік комитеті сыбайлас жемқорлыққа қарсы іс-қимыл бағытындағы жұмыстың қорытындысын шығарды. Ресми деректерге көз жүгіртсек, жыл басынан бері барлығы 126 қылмыстық құқық бұзушылық тіркелген. Оның 110-ы сыбайлас жемқорлық қылмыстарына қатысты. Анықталған заң бұзушылықтардың басым бөлігі пара алу, алаяқтық және қызметтік өкілеттікті теріс пайдалану деректерімен байланысты.
Тексеру нәтижесінде 89 адамның заңсыз қызметі тоқтатылды. Сонымен қатар 129 қылмыстық істі тергеу аяқталып, оның 121-і сотқа жолданды.
Аяқталған істер бойынша келтірілген залалдың жалпы сомасы 18 млрд теңге көлемінде. Оның ішінде 100 млн теңгеден астам қаражат бюджетке қайтарылған.
