Қазақстанда шалғай елді мекендерді интернет байланысымен қамтамасыз ету жұмысы қарқынды жүріп жатыр. Биыл елде тағы екі шетелдік спутник интернетінің операторы жұмыс істеп бастайды. Бұл туралы бүгін өткен Үкімет отырысында Премьер-министрдің орынбасары – жасанды интеллект және цифрлық даму министрі Жаслан Мадиев айтты.
Шалғай елді мекендерді интернетпен қамтамасыз ету мәселесі спутниктік байланыс жобалары арқылы шешіліп жатыр. Қазір Қазақстанда 3 спутниктік интернет операторы жұмыс істейді. Таяу уақытта тағы 2 шетелдік компания пайда болады. Олар бойынша пилоттық сынақты осы жылы өткізу жоспарланған, – деді министр.
Ведомство басшысы биыл пойыздар мен ұшақтарда да интернет желісі іске қосылатынын атап өтті.
Биыл Қазақстан темір жолы пойыздары мен Air Astana ұшақтарында спутник интернеті іске қосылады. Әкімдіктер интернет жоқ жерлерде, туристік және жету қиын локацияларда жергілікті бюджет қаражаты есебінен спутниктік интернетпен қамтамасыз етуі қажет, — деді Жаслан Мадиев.
Сонымен қатар алдағы екі жылда республикалық және облыстық маңызы бар 40 мың км автожолда мобильді байланыс орнатылады.
Бұл республикалық және облыстық маңызы бар 40 мың км жолды құрайды. Жобаны алдағы екі жылда аяқтау жоспарланған. Әкімдіктерден жер учаскелерін жедел бөлу және электр қуатына қосылуға техникалық жағдай жасау талап етіледі, — деді ол.
