Өскеменде полицейлер өзенге ағып кете жаздаған ана мен баланы құтқарды, деп хабарлайды F16.kz тілшісі Polisia.kz сайтына сілтеме жасап.
Оқиға 17 шілдеде болған. Сағат 14:20 шамасында «102» жедел арнасына Өскемен қаласының тұрғыны қоңырау шалып, оның танысы кішкентай қызымен бірге Үлбі өзеніне суға түскенін және оларды қатты ағыс алып кеткенін хабарлаған.
Дабыл туралы ақпаратқа жедел әрекет еткен кезекші көмекшісі Олжас Оразов болды. Ол тек жақын маңдағы патрульдік полиция экипажына хабар беріп қана қоймай, нақты координаттар бойынша оларға бағыт беріп отырды. Осы үйлесімді іс-қимылдың арқасында оқиға орнына патрульдік полиция батальоны ротасының командирі Мадияр Мұхамеджанов басқарған №9 экипаж шұғыл жетті.
Бұл уақытта осы маңда болып, рациядан хабарды естіген Үлбі полиция бөлімінің криминалдық полиция бөлімшесі бастығының орынбасары Сұңғат Сейілжанов та көмекке асыққан. Ол оқиға орнына бірінші жетіп, бірден суға секірген. Сол сәтте өзен ағысы анасы мен баласын едәуір қашықтыққа алып кеткен еді, алайда офицер оларға жетіп, зардап шегушілерді судың бетінде ұстап тұра алды. Көп ұзамай қарама-қарсы жағадан Мұхамеджанов те көмекке келді. Алайда, қатты ағыс салдарынан олардың өз беттерінше жағаға шығуы мүмкін болмады. Сол себепті, полицейлер құтқарушылардың қайықпен келуін күтті.
– Осылайша, үйлесімді іс-әрекет пен жедел шешім қабылдаудың арқасында қайғылы жағдайдың алды алынды. Қазіргі уақытта анасы мен қызының өміріне ешқандай қауіп төніп тұрған жоқ. Оқиғаның мән-жайы анықталып жатыр, – деп жазады дерек көзі.
