Мемлекет басшысы Қасым-Жомарт Тоқаев жаңа Конституция жобасы бойынша өтіп жатқан республикалық референдумға қатысып, Астанадағы Оқушылар сарайында орналасқан №51 референдум учаскесінде дауыс берді, деп хабарлайды F16.kz порталы Ақордаға сілтеме жасап.
Президент дауыс бергеннен кейін журналистерге арналған брифинг өткізді. БАҚ өкілдерінің сұрағына жауап берген Қасым-Жомарт Тоқаев жаңа Конституция ел дамуына тың серпін беретінін атап өтті.
Бұл Конституция елімізді ілгерілетініне ешқандай күмәнім жоқ. Біз көштен қалмай, прогрестің алдыңғы шебінде жүруіміз керек. Озық ел болсақ, басқа мемлекеттер бізге құрметпен қарайды. Ел тағдыры өз қолымызда. Сол үшін табанды еңбек ету керек. Алдымызда тұрған ең үлкен мақсат – осы, — деді Президент.
Мемлекет басшысы журналистерге жаңадан пайда болатын Вице-Президент лауазымы не үшін қажет екенін түсіндірді.
Вице-Президент лауазымы туралы әртүрлі әңгіме айтылып жүргенін білемін. Шын мәнінде, бірқатар шет мемлекетте Вице-Президент лауазымы бар. Кейбір сарапшылар «Қазақстанда билік ішінде бәсеке өршіп, түрлі үрдістер жүреді, елге зиян келеді» деген пікір білдіруде. Бұл мәселеде қоғамға зардап келетіндей қорқыныш жоқ. Вице-Президент лауазымы біздің билік институттарын нығайтады. Келешекте бәрі айқын болады. Мемлекет басшысы ретінде бұл лауазымға, жалпы бүкіл реформаға үлкен үміт артып отырмын. Ал Президент сайлауы қазіргі Конституцияға сәйкес 2029 жылы өз мерзімінде өтеді, — деп нақтылады ол.
