Астанада өтіп жатқан Өңірлік экологиялық саммит аясында мемлекет басшылары RES 2026 EXPO халықаралық көрмесінің павильондарын аралады. Іс-шара жасыл және орнықты технологияларға арналған ірі диалог алаңына айналды, деп хабарлайды F16.kz порталы Ақорданың баспасөз қызметіне сілтеме жасап.
Президенттер мен шетелдік делегация жетекшілеріне Қазақстан, Армения, Грузия, Қырғызстан, Моңғолия, Тәжікстан, Түрікменстан және Өзбекстан елдерінің павильондары таныстырылды. Экспозицияларда жасыл энергетика, табиғи ресурстарды басқару және экологиялық саясаттағы ұлттық басымдықтар қамтылған.
Көрмеде ұсынылған жобалар экожүйелерді сақтау, қоршаған ортаны қорғау саласындағы халықаралық ынтымақтастықты нығайту және экология проблемаларын шешудің жаңа тәсілдерін іздеуге бағытталған. Сонымен қатар Арал өңірін қалпына келтіру мәселесіне ерекше назар аударылған.
Мемлекет басшыларына бизнес құрылымдардың экологиялық жобалары таныстырылды. Бұл бастамалар аясында компаниялар жасыл энергетика, экологиялық орта қалыптастыру және қалдықтарды қайта өңдеу бағыттарында нақты өндірістік шешімдер ұсынып отыр.
Ауқымды көрме 30 елден келген 240-тан астам қатысушыны біріктіргді. 120-дан астам павильонда орнықты даму саласындағы үздік тәжірибелер мен инновациялық жобалар ұсынылған.
Іс-шара аясында мемлекет пен бизнес арасындағы байланысты нығайтатын инвестициялық форум да ұйымдастырылып, ол маңызды келіссөздер алаңына айналды.
Сонымен қатар көрме барысында халықаралық кездесулер мен сарапшылар пікірталастары өтіп жатыр. Мұнда экология мен орнықты даму саласындағы өзекті мәселелер кеңінен талқылануда.
Бағдарлама аясында «жасыл» стартаптар байқауы ұйымдастырылып, жас кәсіпкерлердің инновациялық жобаларына қолдау көрсетілуде. Қонақтар сондай-ақ аймақ дизайнерлерінің туындыларын тамашалап, экологиялық кинофестивальге қатыса алады.
