Бүгін өткен Үкіметтің кезекті отырысында елдің құқықтық және әлеуметтік дамуындағы маңызды бастамалар талқыланды. Премьер-министр Олжас Бектенов төрағалық еткен жиынға Шығыс Қазақстан облысы әкімдігінің өкілдері онлайн қатысты, деп хабарлайды F16.kz.
Отырыстың күн тәртібінде жаңа Конституцияны іске асыру тетіктері, заңнаманы жаңарту, сондай-ақ азаматтардың құқықтарын қорғауға бағытталған бірқатар өзекті мәселелер қаралды.
Үкімет басшысы жаңа Конституцияның нормаларын толыққанды жүзеге асыру үшін жүйелі әрі кезең-кезеңімен атқарылатын жұмыстардың маңызына тоқталды. Оның айтуынша, қазір жаңа Конституцияны ілгерілету бойынша арнайы іс-шаралар жоспары әзірленіп жатыр және ол жуық арада бекітіледі.
Сонымен қатар қолданыстағы заңдар мен заңға тәуелді актілерді жаңартылған Ата заң талаптарына сәйкестендіру міндеті тұр. Бұл бағыттағы жұмыстар елдегі құқықтық жүйенің тиімділігін арттыруға және азаматтардың құқығын қорғауды күшейтуге мүмкіндік береді.
Жиын барысында Үкімет мүшелері жаңа Конституция аясында жүзеге асырылатын әлеуметтік және білім беру саласындағы өзгерістерге де тоқталды. Премьер-министрдің орынбасары – мәдениет және ақпарат министрі Аида Балаева тегін медициналық көмекті қаржыландыру көздері ұлғайтылатынын мәлімдеді. Бұл халықтың денсаулығын сақтау жүйесінің қолжетімділігін арттыруға бағытталған маңызды қадамдардың бірі ретінде бағаланды.
Ғылым және жоғары білім министрі Саясат Нұрбек жаңа Конституцияның негізгі ережелері еліміздегі барлық жоғары оқу орындарының білім беру бағдарламаларының мазмұнына енгізілетінін атап өтті. Бұл бастама болашақ мамандардың құқықтық сауатын арттырып, конституциялық құндылықтарды терең түсінуге жол ашады.
Сондай-ақ, отырыста азаматтардың дербес деректерін қорғау мәселесіне ерекше назар аударылды. Өзгертілген Конституцияда жеке мәліметтерді заңсыз жинау, өңдеу, сақтау және пайдаланудан қорғау құқығына заң жүзінде кепілдік берілгені белгілі. Осы нормаларды іске асыру мақсатында заңнамаға бірқатар өзгеріс енгізу жоспарланып отыр. Жасанды интеллект және цифрлық даму министрі Жаслан Мәдиев бұл бағытта нақты шаралар қарастырылып жатқанын жеткізді. Оның айтуынша, дербес деректердің жаппай таралуы үшін қылмыстық жауапкершілік енгізу, сондай-ақ әкімшілік айыппұл мөлшерін 5000 айлық есептік көрсеткішке дейін арттыру көзделген. Бұл өзгерістер азаматтардың жеке өміріне қол сұғылмауын қамтамасыз етуге және цифрлық қауіпсіздікті күшейтуге бағытталған.
Отырыста көтерілген тағы бір маңызды мәселе әкімшілік құқық бұзушылықтар бойынша рақымшылық жасау бастамасы болды. Олжас Бектенов бұл ұсыныстың Мемлекет басшысының жаңа Конституцияның қабылдануына байланысты көтерген бастамаларының бірі екенін атап өтті. Оның айтуынша, бұл шара азаматтар мен мемлекеттің қауіпсіздігіне қатер төндірмейтін құқық бұзушылықтарға қатысты қолданылады.
Әкімшілік істер бойынша рақымшылық туралы бастама ел тарихында алғаш рет көтеріліп отыр, Ішкі істер және Әділет министрліктері Бас прокуратурамен бірлесіп, екі апта ішінде рақымшылық жасау тетіктері бойынша егжей-тегжейлі ұсыныс енгізсін, — деді Премьер-министр.
Жалпы, Үкімет отырысында қаралған мәселелер жаңа Конституцияның қағидаларын іске асыруға бағытталған кешенді шараларды қамтиды. Қабылданатын шешімдер елдің құқықтық жүйесін жетілдіруге, азаматтардың құқықтары мен бостандықтарын қорғауды күшейтуге және мемлекеттік басқарудың тиімділігін арттыруға негіз болады.
