Самар аудандық жер қатынастары бөлімінің басшысы мемлекеттік мекеменің ресми парақшасында бос жер учаскелері туралы расталмаған (жалған) ақпарат таратқан, деп хабарлайды F16.kz.
Белгілі болғандай, аудан әкімі аппаратының сайтында жалпы ауданы 180,34 га бос шабындық алқаптардың және 30,62 га жайылым бар екендігі туралы ақпарат қойылған.
Ал ШҚО бойынша «Азаматтарға арналған үкімет» мемлекеттік корпорациясы КЕАҚ филиалының мәліметтеріне сәйкес, сұралған учаскенің шабындық алаңы 193,4 га, жайылымдар 30,0 га құрайтыны анықталған.
Осы факті бойынша аудан прокуратурасы лауазымды тұлғаға қатысты ҚР Әкімшілік құқық бұзушылық туралы кодекстің 456-2-бабының 1-бөлігі бойынша (мемлекеттік органның жалған ақпарат таратуы) іс қозғады. 25 маусымда Самар ауданы сотының қаулысымен жер қатынастары бөлімінің басшысы аталған әкімшілік құқық бұзушылық жасағаны үшін кінәлі деп танылды. Оған 117 960 теңге көлемінде айыппұл түрінде жаза тағайындалды. Сот актісі заңды күшіне енді, — делінген прокуратура хабарламасында.
Облыстық прокуратура заңдылықты қамтамасыз ету және мемлекеттік органдардың халықты жаңылыстыратын, анық емес ақпаратты таратуына жол бермеу жөнінде кешенді шаралар қабылдайтынын еске салады.
