Бүгін Өскемендегі екі ірі референдум учаскесінде дауыс берумен қатар жәрмеңке көрігі қызды. Онда көпшілік назарына қолөнер бұйымдары, зергерлік әшекейлер, ұлттық нақышта тігілген киімдер, жергілікті жерде өндірілген азық—түлік өнімдері ұсынылды, деп хабарлайды F16.kz.
Шоқан Уәлиханов атындағы №3 мектеп-лицейде орналасқан №31 дауыс беру учаскесі бүгін таңғы сағат 7.00-ден бастап жұмыс істеп тұр. Түс ауғанша бұл жерге тіркелген адамдардың дені өз таңдауын жасап үлгеріпті. Мектептің ауласына аттап басқан сәттен мерекелік атмосфера сезіледі. Көңілді музыка ойнап тұр. Арасында әншілер жанды дауыста ән шырқап, би билейді. Өнерпаздар қатарында өзге ұлт өкілдері де бар. Солардың бірі танымал әншісі Роза Рымбаева орындайтын «Наурыз-думан» әнін нақышына келтіре шырқап, көрерменнің ықыласына бөленді. Тыңдарман қауым ән аяқталған сәтте ду қол шапалақ соғып, ризашылықтарын білдірді.
Жәрмеңкеде ұсынылған бұйымдар мен тағам түрлері келушілердің қызығушылығын тудырып, көпшілік оларды тамашалап қана қоймай, сатып алып жатты.
Дауыс беруге келдім. Референдум жақсы өтіп жатыр. Концерт қойып, сауда-саттық ұйымдастырыпты. Жәрмеңкеде ұлттық тағамдарымыз бен қолөнер бұйымдары мол екен. Адамдар сатып алып жатыр. Мен өзім де ауылдың дәмінен алдым. Мұнда келген адамдардың бәрі көңілді, мерекелік атмосфера сезіліп тұр. Бұл күн еліміз үшін өте маңызды. Сондықтан дұрыс таңдау жасау керек. Бастысы халқымыз аман, ел іргесі бүтін болсын, – деді Өскемен тұрғыны Бақыт Укубаева.
Ұйымдастырушылардың айтуынша, мұндай шаралардың басты мақсаты – тұрғындарға мерекелік көңіл-күй сыйлау және ұлттық мәдениетті насихаттау. Сонымен қатар, жергілікті кәсіпкерлер мен қолөнер шеберлеріне өз өнімдерін көпшілікке таныстыруға мүмкіндік беру.
Осылайша, бүгін Өскемендегі референдум учаскелерінде дауыс беру процесі мәдени шаралармен ұштасып, қала тұрғындары үшін ерекше күнге айналды. Адамдар бір жағынан азаматтық таңдауын жасаса, екінші жағынан жәрмеңке аралап, концерттік бағдарламаны тамашалап, көтеріңкі көңіл күйде тарқасты.
